Tədqiqatın məqsədi. Ağciyər xərçənginin müxtəlif formalarının diaqnostikasında rentgenoqrafiya və kompüter tomoqrafiya müayinə üsullarının alqoritmdəki yerinin müəyyənləşdirilməsi olmuşdur. Material və metodlar. Hazırki tədqiqatda 160 xəstənin məlumatları daxil edilmişdir. Tədqiqat həm retrospektiv, həm də prospektiv aparılmışdır. Ağciyər xərçəngi 139 xəstədə aşkarlanmışdır. (periferik ağciyər xərçəngi - 89 (55,6%), mərkəzi ağciyər xərçəngi - 50 (31,3%)) Nəticələr. Elmi-tədqiqat işinin nəticələri göstərir ki, periferik ağciyər xərçənginin diaqnostikası zamanı rentgenoqrafiyanın həssaslığı (Se) 69,7±8,0%, spesifikliyi (Sp) 50,0±12,5%, diaqnostik dəqiqliyi (DD) 63,3±6,9%; komputer tomoqrafiyanın həssaslığı 88,8±3,3%, spesifikliyi – 71,4±9,9%, diaqnostik dəqiqliyi – 85,5±3,4%; mərkəzi ağciyər xərçənginin diaqnostikasında isə rentgenoqrafiyanın müayinəsi üçün bu göstəricilər uyğun olaraq 84,8±4,4% (Se), 50,0±12,5% (Sp), 78,0±4,6% (DD); komputer tomoqrafiya müayinəsi üçün 96,0±2,8% (Se), 71,4±9,9% (Sp), 88,7±3,8% (DD) təşkil etmişdir. Yekun. Bu məlumatları istifadə edərək, ağciyər şişlərinin diaqnozu üçün bir alqoritm təyin olundu. Diaqnostik müayinənin təsvir olunan alqoritmi xəstənin diaqnozunu sürətləndirməyə imkan vermişdir.