Cor triatriatum sinister - ретка вродена срцева мана- наши искуства во дијагнозата и третманот во детска возраст

Abstract

Cor triatriatum sinister е ретка срцева мана кај која левата преткомора е поделена на два дела со фибромускулна мембрана. Проксималната преткомора ги прима пулмоналните вени заедно со крвта која тие ја носат, а дисталната или (вистинска) преткомора е вообичаено празна и таа е поделена од комората со митралната валвула. Има постојана комуникација помеѓу двата дела на поделената преткомора преку која крвта се пренасочува кон левата комора. Маната е многу ретка, најчесто е изолирана, но може да оди во комбинација со други срцеви мани. Презентираме случаи на две деца на возраст од 8 и 3 години во времето кога е поставена дијагнозата. Кај обете причина за дијагнозата бил замор и чуен срцев шум. За поставување на дијагнозата беа користени анамнезата, клиничките знаци и симптоми, ЕКГ, рендген на срце и бели дробови и златниот стандард - ехокардиографијата. Дефинитивно излекување беше направено со изведување на кардиохируршка ресекција на фибромускулната мембрана со користење на екстракорпорална циркулација. Потребно е регуларно периодично следење на децата со цел откривање на доцни компликации од типот на нарушувања на срцевиот ритам.