Gaur egungo hidrogeno-ekoizpena: metanoaren ur-lurrun bidezko erreformatzea

Abstract

Gure gizartean, hidrogenoa gero eta garrantzia handiagoa duen energia-iturria da. Ekoizpen-teknika guztien artean, metanoaren ur-lurrun bidezko erreformatzea da erabiliena. Prozesua hurrengo urratsetan oinarritzen da: gas naturalaren garbiketa, beroketa-prozesua, labe erreformatzailea, ur-lurrunaren bihurketa eta hidrogenoaren bereizketa; labe erreformatzailea elementurik garrantzitsuena izanik. Dena den, teknika honek hainbat erronka ditu, igorritako CO2-ari, katalizatzaileen diseinuari eta energia kontsumoari lotutakoak. Dokumentu honetan, metanoaren lurrun-bidezko erreformatze-prozesuaren deskribapen orokorra aurkezten da, errekuntza-ganberaren, katalizatzaileen, eraginkortasun termikoaren eta labe erreformatzailearen modelizazioaren nondik norakoak azalduz.