Şəkərlə qarışdırılmış nar dənələrinin hazırlanması texnologiyasının işlənməsi

Abstract

Xülasə. Respublika əhalisini ilboyu ekoloji cəhətdən təmiz narla və ondan istehsal olunmuş məhsullarla təmin etmək dövrümüzün ən aktual problemlərindəndir. Çünki nar meyvəsinin və ondan hazırlanan məhsulların kimyəvi tərkibi şəkərlərlə, üzvi turşularla, suda və yağda həll olan vitaminlərlə, fenol birləşmələri ilə, mineral maddələr və s.-lə zəngindir.Tədqiqat obyekti kimi Göyçay ərazisində yetişən ənənəvi nar sortlarından -Nazik Qabıq, Bala Mürsəl, Azərbaycan Bağçılıq və Subtropik Bitkilər Elmi-Tədqiqat İnstitutunun Göyçay dayaq məntəqəsində yetişdirilən yeni sortlardan -Qəşəng, Yeni Güleyşə sortları tədqiq edilmişdir.İşin məqsədi şəkərlə qarışdırılmış nar dənələrinin hazırlanma texnologiyasının işlənməsidir.İşin elmi yeniliyi. Müxtəlif nar sortlarının fiziki-kimyəvi xüsusiyyətləri, qidalılıq dəyəri və eyni zamanda hazırlanan məhsulda əsas fiziki-kimyəvi göstəricilər tədqiq olunmuş, məlum olmuşdur ki, nar meyvəsinin tərkibi insan orqanizminin normal inkişafı üçün lazım olan qida komponentlərindən sadə şəkərlərlə, üzvi turşularla, fenol birləşmələri, makro və mikroelementlərlə daha zəngindir. Ona görə də nar meyvələrindən bütün ilboyu istifadə edilməsi üçün şəkərlə qarışdırılmış nar dənələrinin hazırlanması texnologiyası işlənmişdir. Burada əsas məsələ məhsulun yüksək temperatur təsirinə məruz qalmamasıdır.Nəticə. Aparılmış araşdırmalar zamanı müəyyən edilmişdir ki, istilik emalına uğramamış nar şirəsinin tərkibində antioksidantların yüksək konsentrasiyası mövcuddur və şirənin sirri də məhz bundadır. Şəkərlə qarışdırılmış nar dənələrinin hazırlanması zamanı əsas məqsəd nar şirəsinin fizioloji cəhətdən aktiv olan maddələrinin qidalandırıcı və orqanoleptik xassələrinin qorunub saxlanılmasıdır. Şəkərdə nar dənələri tərkibində yalnız az miqdarda şəkər tozu əlavə olunmaqla digər konservant və rəng qatışıqlarının olmaması ilə fərqlənir.