INLEIDING"Sukses" word gemeet aan die effektiewe bydrae wat elkeen maak ter bevordering van die funksionering van sy/haar werk, gesin en die breë gemeenskap (Burud & Tumulo, 2004:31; Cascio, 2003:31,672).In die hedendaagse samelewing streef mense toenemend na 'n sinvolle betrekking wat uitdagings en geleenthede bied om uitdrukking aan hul talente te gee. Hoewel daar meer waarde aan 'n gebalanseerde lewe geheg word, waarbinne die loopbaan én die gesin hul regmatige deel kry, slaag werkende mense nie noodwendig in die handhawing van die genoemde balans nie.Hoewel werkgewers neig om aspekte van gehalte, produktiwiteit, en dienslewering aan te spreek, ignoreer hulle dikwels die impak van stres op die werknemer, terwyl stres ooglopend 'n saak is wat aangespreek behoort te word. Werkgewers huldig dikwels die mening dat werknemers self die balans in hul lewens moet handhaaf (Kenny, 2000:380;Steenkamp & Van Schoor, 2002:ix) en word die werknemer se reaksie op die voortdurend veranderende werksomgewing (Jansen, 2002:160; Sithole, 2002:21) en gepaardgaande stressore as die bepalende faktore beskou in die bereiking van gesondheid en welstand aldan nie. Van die werknemer word verwag om balans te bewerkstellig tussen die verskillende eise wat aan hom gestel word in die werk-gesin interaksie ten einde te voorkom dat gemelde veranderinge aanleiding gee tot 'n streservaring wat die werknemer se gehalte van werklewe negatief beϊnvloed (Barling, 1995:20-21; Claassen, Schepers & Roodt, 2004:83; Frone, 2003:145; James & Arroba, 1999:29; Kenny, 2000:384).In hierdie artikel word 'n literatuuroorsig verskaf en geïntegreer met die navorsingsbevindige soos uit die oorspronklike studie verkry, waarna dit opgevolg word met die aanbevelings en die slotopmerking. Die kwantitatiewe navorsingsbenadering is as aangewese benadering en die aangepaste "ASSET"-posvraelys (Babbie, 2007:298; Cartwright & Cooper, 2004:120; Neuman, 1997:31) as geskikte data-insamelingsmetode vir die studie geïdentifiseer en aangewend. Die ondersoek is by 'n groot tersiêre opleidingsinstelling in Suid-Afrika, onderneem. Die waarskynlikheidseleksie proporsioneel-gestratifiseerde steekproef (Babbie & Mouton, 2006:191), is gebruik in die seleksie van respondente vanuit die twee gekose fakulteite ten einde ondersoek in te stel na die aard, omvang en impak van stres op die GWL van werknemers aan die betrokke tersiêre opleidingsinstelling. Die populasie het uit 760 personeel bestaan (593 akademiese personeellede en 167 nie-akademiese personeel). Driehonderd (300) vraelyste is in elk van die twee fakulteite versprei om 'n steekproefgrootte van 600 te verkry. 'n Totaal van 114 (19%) vraelyste is terug ontvang, wat 81 akademiese personeellede en 33 nieakademiese personeellede vanuit beide fakulteite ingesluit het.In die artikel fokus die outeurs slegs op drie kernaspekte van die navorsingsbevindinge, naamlik stressimptome, werklading en faktore wat stres by werknemers veroorsaak, wat geïntegreerd met die literatuur aangebied word. Die meerderheid respondente wat aan die s...
