ئامانجه‌كانی ئه‌م توێژینه‌وه‌ خۆی له‌دوو به‌ش ده‌بینێته‌وه‌، ئامانجی گشتی توێژینه‌وه‌كه‌، كه‌ بریتی یه‌ له‌زانینی ئاستی خودچالاكی مامۆستایانی زانكۆ، و ئامانجی تایبه‌تی كه‌ بریتییه‌ له‌ زانینی كاریگه‌ریی جیاوازی ڕه‌گه‌ز له‌سه‌ر ئاسته‌كه‌یان، ئینجا زانینى په‌یوه‌ندى خودچالاكی مامۆستایانى زانكۆ بۆ یه‌كێك له‌ گۆڕاوه‌ دیمۆگرافیه‌كانی ڕاپرسی توێژینه‌وه‌كه‌، كه‌بریتییه‌ له‌ گۆڕاوی بڕوانامه‌، بۆ به‌ده‌ستهێنانی ئه‌م ئامانجه‌ گشتی و تایبه‌تیانه‌ی توێژینه‌وه‌ی به‌رده‌ست، 72 مامۆستای زانكۆ به‌شێوه‌یه‌كی هه‌ڕه‌مه‌كی خۆبه‌خشانه‌ به‌شداریان كرد. بۆ كۆكردنه‌وی زانیاری توێژینه‌وه‌ی به‌رده‌ست ڕاپرسیه‌كی 10 بڕگه‌یی وه‌رگیراو به‌كارهات كه‌ 5 هه‌ڵبژاردنی هه‌یه‌، له‌به‌رامبه‌ر هه‌ر بڕگه‌یه‌ك به‌شێوه‌یه‌كی یه‌كسانی ئاماژه‌ی پێكرابو تاكو به‌شداربو به‌ئاسانی بتوانێت ئه‌و وه‌ڵامه‌ هه‌ڵبژێرێت كه‌له‌گه‌ڵ بۆچونی تایبه‌تی خۆی ده‌گونجێت، بۆ دڵنیایی بون له‌به‌های ڕاستگۆیی و جێَگیری  ئامرازی كۆكردنه‌وه‌ی زانیاری توێژینه‌وه‌كه‌، ڕاپرسیه‌كه‌ له‌ماوه‌یه‌كی كورتدا كه‌ له‌ڕۆژێك زیاتر نه‌بو به‌سه‌ر به‌شێك له‌ نمونه‌ی توێژینه‌وه‌كه‌ دابه‌شكرا پاش كۆكردنه‌وه‌ی ڕاپرسیه‌كان و دابه‌زاندنی بۆ سه‌ر به‌رنامه‌ی ئاماری تایبه‌ت، داتاكان شیكردنه‌وه‌یان بۆ ئه‌نجامدرا، پاشان ده‌ركه‌وت كه‌ به‌هاكه‌یان له‌ئاستێكی گونجاودایه‌ به‌مه‌ش تویژینه‌وه‌كه‌ به‌رده‌وامی پێدرا بۆ دابه‌شكردن به‌سه‌ر نمونه‌ی كۆتایی . پاش كۆكردنه‌وه‌ی زانیاری له‌ نمونه‌ی كۆتای تو‌ێژینه‌وه‌كه‌ ئینجا شیكردنه‌وه‌یان به‌ به‌رنامه‌ی spss  هه‌گبه‌ی ئاماری بۆ زانسته‌ كۆمه‌ڵایه‌تییه‌كان كه‌ تایبه‌ته‌ به‌ بواری ده‌رونی و په‌روه‌رده‌ی كۆمه‌ڵایه‌تی مرۆڤایه‌تی، ئه‌نجامه‌كان ده‌ریانخست كه‌ ئاستی گشتی خودچالاكی په‌روه‌رده‌یی مامۆستایانی زانكۆ له‌ئاستێكی به‌رزدایه‌، به‌ڵام هیچ جیاوازیه‌كی به‌ڵگه‌داری ئاماریی له‌ ئاستی خودچالاكی مامۆستایان ده‌رنه‌كه‌وت له‌نێوان هه‌ردوو ڕه‌گه‌زی جیاوازی نێر ومێی به‌شداربوانی توێژینه‌وه‌كه‌، هه‌رچه‌نده‌ ئه‌نجامەکانی توێژینه‌وه‌كه‌ ئاماژه‌ به‌وه‌ده‌كه‌ن كه‌، ئاستی خودچالاكی ڕه‌گه‌زی مێ ئاسته‌كه‌یان به‌رزرتر بو به‌ڵام به‌ڵگه‌داری ئاماریی نه‌بوو. له‌كۆتایی ئامانجە تایبه‌تیه‌كان ده‌ریانخست كه‌ په‌یوه‌ندییه‌كی نه‌رێینی له‌نێوان بڕوانامه‌ وئاستی خودچالاكی په‌روه‌ده‌ییان هه‌یه‌، واته‌ هه‌رچه‌نده‌ بڕوانامه‌ به‌رزتر بێت ئاستی خودچالاكیان نزمتره‌، به‌ڵام ئه‌م په‌یوه‌ندییه‌ له‌ئاستی به‌ڵگه‌داری ئاماریی نه‌بو. له‌کۆتایی وله‌ژێر ڕۆشنایی ئه‌نجامه‌كان چه‌ندین پیشنیاز و ڕاسپارده‌ پێشكه‌شكران.